सिक्किमले दुइ वर्षभन्दा अघिको समयमा कमाएको मान सम्मान, प्रतिष्ठा र समृद्धिमा आज ग्रहण लागेको छ: एस डि एफ
राज्यको विकासका विभिन्न मापदण्डमध्ये महिला सशक्तीकरण पनि एउटा प्रमुख आधार हो। यसर्थ राज्यको सर्वाङ्गीण विकासमा महिला जातिको उत्थान र सुरक्षित जीवन सुनिश्चित भएको हुनुपर्दछ। यस प्रमुख कार्यको निम्ति सत्तासीन सरकारका नेतृत्वको उदार विचारधारा तथा महिलामुखी कार्ययोजना मुख्य हुन्छ। सिक्किमको सन्दर्भमा व्यवस्था परिवर्तनको नारासहित ल्याएको तथाकथित परिवर्तनले जनतास्वयंले विगत दुइ वर्षदेखि यता अनेकौं दुर्भाग्यपूर्ण घटनाहरूको साक्षी बन्दै भयपूर्ण जीवन बिताउन परिरहेको छ। सिक्किमले दुइ वर्षभन्दा अघिको समयमा कमाएको मान, सम्मान, प्रतिष्ठा र समृद्धिमा आज ग्रहण लागेको छ। वर्तमान मुख्यमन्त्री श्री पी.एस. गोलेको नेतृत्व आएदेखि सिक्किमको मान-सम्मान बदनाम भएको छ। यसको एसडीएफ पार्टी चेलो मोर्चा कड़ा शब्दमा निन्दा गर्दछौं।
राज्यका महिलाहरू आज सुरक्षित छैनन्। विगत दुइ वर्षदेखि यता महिलामाथि हुने प्राणघातक हमला, हिंसा, यौन उत्पीड़न, घरेलु हिंसा, छोरी-नानीमाथि हुने बलात्कार आदिजस्ता घटनाहरूले राज्य र राज्यवासी अशान्त छन्। यस प्रकारका निन्दनीय घटनाहरू एसकेएम सरकारको नेतृत्वमा राज्य प्रशासनलाई प्रभावकारी र जनपक्षीय रूपमा सञ्चालन गर्नसक्ने क्षमता तथा उत्कृष्ट योजनाहरूको कमीले घटेको हो भनी एसडीएफ पार्टी चेली मोर्चा ठहर गर्दछ।
गत ११ जूनका दिन राजधानी गान्तोकको नजीक डेवलपमेण्ट क्षेत्र निवासी श्री सपन गिरीकी धर्मपत्नी श्रीमती अम्बिका छेत्रीले आत्महत्या गरेको घटनाले सबैलाई आहत तुल्याएको छ। उनकी बहिनी तथा परिवारपक्षले अम्बिकाल छेत्री घरेलु हिंसाको शिकार बन्नपुगेको आशङ्कामा प्रशासनसमक्ष न्यायको गुहार लगाइरहेका छन्। जानकारीअनुसार श्रीमती अम्बिका छेत्री सत्तारूढ़ दलको नारीशक्तिकी एक कर्मठ सदस्य हुन् भने उनका पति श्री सपन गिरी पनि एसकेएम पार्टीका माथिल्लो तहसम्म पहुँच भएका सक्रिय कार्यकर्ता हुन्। यसैले सत्यतामाथि ढाकछोप हुनुहुँदैन भन्ने हाम्रो अड़ान छ। राज्य पुलिस प्रशासनले यस्ता कैयौं घटनाको छानबिन प्रक्रियालाई पक्षपात गरेर आजसम्म सत्यता प्रकाश पारेको छैन। यसैले हामी भन्छौं – स्वर्गीया अम्बिका छेत्रीले न्याय पाउनुपर्छ। पुलिस प्रशासनले पक्षपात र कुनै दबाउबिना छानबिन गरी सत्य उद्घाटन गर्नुपर्छ।
यसका साथै स्वर्गीया अम्बिका छेत्रीको अप्राकृतिक मृत्युप्रति एसडीएफ पार्टी चेली मोर्चा हार्दिक समवेदना व्यक्त गर्दै पुलिस प्रशासनले सत्य विषयको छानबिन गरेर उचित न्याय दिनुपर्दछ भन्ने माग पनि राख्दछ।
यसरी नै, मानेबुड-देन्ताम निर्वाचन क्षेत्र निवासी सुश्री गङ्गामाया शर्माले दुइ दिनअघि सामाजिक सञ्जालद्वारा आफूलाई सत्तारूढ़ पार्टीका एकजना युवा नेताले मुख्मन्त्रीसँग अपोइण्टमेण्ट मिलाइदिने अनि रोजगार दिलाइदिने वचन दिएकोले आफू गान्तोकमा आएर एउटा होटलमा बिखर्ची भएर बस्नु परिरहेको विषयलाई साझा गर्दै सहयोगको निम्ति अपील गरेकी छन्। मुख्यमन्त्रीलाई भेट्ने अथवा रोजगार पाउने ठूलो आशामा आएकी सुश्री गङ्गामाया शर्माले भोगिरहेको पीडापूर्ण परिस्थितिले एसकेएम सरकारको कार्यप्रणालीको विफलता र एसकेएम कार्यकर्ताहरूको झुट बोल्ने प्रवृत्तिलाई उदाङ्गो पारेको छ। यसको हामी घोर विरोध गर्दै झुटो दिलासामा सिक्किमे छोरीहरूलाई बिखर्ची र बिचल्ली तुल्याउने सत्तारूढ़ दलका नेता-कार्यकर्ताहरूलाई यस प्रकारको निन्दनीय कृत्य नगर्ने चेताउनी पनि दिँदछौं।
यस्ता घटनाहरूले सिक्किममा अहिले महिलाहरू सुरक्षित छैनन् भन्ने प्रमाणित भएको छ। स्वीस गार्नियर (युनिट दुइ) -की महिला श्रमिक श्रीमती प्रीति भोटियाले आजसम्म न्याय पाउनसकेकी छैनन्। उनलाई हातपात र कुटपिट गर्ने सत्तारूढ़ दलका क्षेत्र स्तरीय युवा उपसंयोजक सुकवीर भुलेज सत्ताको राप र आश्रयमा खुलेआम हिँड़िरहेका छन्। पुलिस प्रशासन र सम्बन्धित निकाय आजसम्म मौन छन्। यसको पनि हामी जोडदार भर्त्सना गर्दछौं।
राज्यमा बढ्दो महिला हिंसा, यौन उत्पीड़न तथा बलात्कारजस्ता काण्डहरूमा एसकेएम सरकारका नेतृत्व पङ्क्ति सजग र सचेत बन्न नितान्त आवश्यक छ। यसका साथै सरकारमा ठूला ओहोदा ओगटिरहेका एसकेएम पार्टीका नारी शक्तिका नेतृहरू पनि महिलाविरोधी यस्ता काण्डहरू रोकथाम गर्दै सिक्किमेली छोरीहरूलाई सम्मानित र सुरक्षित जीवन दिन सजगतापूर्वक सक्रिय बन्न आवश्यक छ। आज अप्रभावकारी र अपरिपक्व नेतृत्वको कारणले नारीशक्तिहरू आफ्नै राज्यभित्र शक्तिहीन र लाचार बनिरहेका छन्। यस दिशामा एसकेएम नारी शक्तिलाई ध्यान दिन हामी सुझाउ दिँदछौं।
