Trending

सिंहदेवी मन्दिर को उद्घाटन, मालबाँसे, बुदाङ पश्चिम सिक्किम

गान्तोक, 12 अक्टोबरः पश्चिम सिक्किमको मलबाँसे बुदाङको ऐतिहासिक हिन्दु तीर्थस्थल मानिएको लुङ्चोके सिंहदेवी मन्दिरमा चारदिने धार्मिक पूजा आयोजन भइरहेको छ। स्थानीय मानिसहरूको सत्प्रयासमा शताब्दी पुरानो धार्मिक आस्था बोकेको यो मन्दिरको जीर्णोद्धारपछि हिजोदेखि यहाँ पूजा-अर्चना शुरु भएको छ। यो मन्दिर मूल सड़कदेखि लगभग 200 फिट दुरीमा अवस्थित छ। मन्दिरमा भक्तजनको सुविधाका लागि सिँढ़ीमा टाइल्स लगाउने कार्य, गेट, शेड, रेलिङलगायतका अन्य पूर्वाधार निर्माण गरिएका छन्।

मन्दिरका अग्रणी भक्त तथा शुभचिन्तक माधवप्रसाद शर्माले मन्दिरको ऐतिहासिक पृष्ठभूमिबारे जानकारी दिँदै भने, “शताब्दी पुरानो यो मन्दिरप्रति स्थानीय मानिसहरूको आस्था र विश्वास जोड़िएको छ। हाम्रा बाजे-बराजुको समयदेखि नै यहाँ स्थानीय मानिसहरूले पूरा-अर्चना गर्दै आएका छन्। यहाँ पूजा-आराधना गर्दा आफ्नो मनोकामना पूरा हुने विश्वास गरिन्छ।” मन्दिरको दर्शन तथा पूरा-अर्चना गर्न आउने भक्तजनको सुविधा र विश्रामका लागि मन्दिर परिसरमा अन्य पूर्वाधार निर्माण गर्ने योजना रहेको छ। यसरी नै भक्तजनका लागि मन्दिर प्राङ्गमणको शुरुमै जुत्ता-चप्पल राख्न शेड निर्माण गरिने पनि योजना रहेको छ। यो मन्दिरको जीर्णोद्धार गर्न स्थानीय मानिसहरूले स्वेच्छाले यथाशक्य सहयोग पुर्‍याएका छन्। स्थानीय एसबी राउत, भानु राई, राजेश खड्का, सोरेङका वर्तमान संयुक्त निदेशक शिवप्रसाद शर्मालगायत अन्य स्थानीय मानिसहरूले सक्रिय रहेर ठूलो योगदान दिँदै आइरहेको उनले बताए।

“यसै वर्ष मन्दिर परिसरमा संसारी माईको मन्दिर पनि निर्माण गरिएको छ भने गणेशको मूर्ति पनि निर्माण गरिएको छ। मन्दिर परिसरमा यत्रतत्र छरिएका दुर्गामाता, सरस्वतीमाता, गणेश भगवान् र अन्य देवी-देवताका ढुङ्गाका मूर्तिहरूलाई सुन्दर ढङ्गमा सजाएर राख्न 10द10 को कोठा निर्माण गरिएको छ। मन्दिर परिसरमै नाग मन्दिर पनि निर्माण गरिएको छ। मन्दिरको निर्माण कार्य 90 प्रतिशत पूरा भएको छ। सिक्किमेली समाजको मानसिकता सरकारमाथि निर्भर रहने गर्दछ। तर यो मन्दिरको जीर्णोद्धार कार्यमा स्थानीय भक्तजन र शुभचिन्तकहरूको सहयोगी भाव रहेको पाउन सकिन्छ। यसलाई साँच्चै उदाहरणका रूपमा लिन सकिन्छ”-पेशाले शिक्षक रहेका शर्माले भने।

“युगौं पहिलाअघि यो मन्दिरमा धूलपूजा पनि गरिएको इतिहास पाउन सकिन्छ। बुदाङ-मलबाँसे क्षेत्रमा हिँउदो महिनामा धूलो उड्ने गरेको कारण रोग फैलिन नपाओस् भनेर धूलपूजा गरिन्थ्यो। दिउँसो धूलपूजा गरेपछि साँझ पख पानी परेपछि धूलो हराएर जाने बूढ़ापाखाहरू बताउँछन्। यसैले यो मन्दिरप्रति मानिसहरूको अगाध आस्था र विश्वास छ”-शर्माले अघि भने।

स्थानीय मानिसहरूले बताएअनुसार सिक्किमका भूतपूर्व मुख्यमन्त्री नरबहादुर भण्डारी स्कूले शिक्षा पूरा गरेपछि उच्च शिक्षा हासिल गर्नका लागि दार्जीलिङ जानअघि यसै मन्दिरमा आएर शिर निहुराएर भगवानको पूरा-अर्चना गरेका थिए। यस्तै प्रकारले भण्डारीले यसै मन्दिरमा पूरा-अर्चना गरेर नै आफ्नो राजनीतिक जीवन शुरु गरेका थिए। उनको शासनकालमा यो मन्दिरको रखरखाउप्रति पनि ठूलो काम भएको थियो। “यसपछिको सरकारकालमा पनि परोक्ष-अपरोक्ष रूपमा सहयोग प्राप्त भएकै छ। मरम्मती कार्य, छाना फेर्ने र पार्टिसनका कामहरू भएकै हुन्। हिजोआज पनि सोरेङ महकुमाका अधिकारीहरूले पनि बेलामौकामा यहाँ आएर निरीक्षण गरिरहेका छन्। मन्दिरका लागि सबैले आफ्नो हैसियतअनुसार योगदान दिइरहेका छन्। यो पवित्र मन्दिरलाई सरकारले रोलु मन्दिर, गान्तोकमा ठाकुरबारी र अन्य उदाहरणीय मन्दिरजस्तै बनाउन चाहेको खण्डमा हामी स्थानीय जनताबाट भरपुर सहयोग पुर्‍याउनेछौं। यो मन्दिर परिसरमा धेरै जमिन छन्। मन्दिरसित जोड़िएको फाँटिलो सरकारी जमिन छ। सरकारले यस दिशामा सहयोग गरेको खण्डमा स्थानीयसँगै भक्तजनका लागि ठूलो उपलब्धि हासिल हुनेछ”-शर्माले भने।

Download Sikkim Chronicle App Download Sikkim Chronicle App

SC Desk

Sikkim Chronicle is a unit of Yonika Infotainment Pvt. Limited. Sikkim’s first registered digital news platform which believes to provide right, reliable and credible news and information to the people of Sikkim and around. We have endeavored to appropriately credit the source of all intellectual property we share through this community.

Related Articles

Leave a Reply

Your email address will not be published. Required fields are marked *

Back to top button